【女友被爆未離婚】陳冠希攜秦舒培離開酒店 激動回應:

我有好多女朋友喎!

陳冠希(Edison)被爆同大陸超模秦舒培拍拖,外間都以為女方已經同華誼兄弟時尚文化傳媒董事總經理趙磊離婚,兩人光明正大交往,仲被拍到一齊返上環蘇杭街The Jervois精品酒店,戀情斷正。點知,原來係婚未離。

噚晚秦舒培老公趙磊喺微信朋友圈發公開信,稱自己同秦舒培未離婚,即係希哥現任女友仲係人妻,更形容自己就好似一個笑話:「當出軌門新聞震驚著我,也震驚大家時,我在憤怒、悲傷之時,選擇聽長輩的勸導:要學會原諒學會放手學會尊重自己,做好自己就行。」「更想問一聲甚麼時候出軌,變成一個光明正大?P.S 離的事還沒辦就需要我的祝福嗎?」

今日下午二時半左右,陳冠希同女友秦舒培又現身The Jervois精品酒店,準備離開,父親陳澤民早一步出嚟。陳冠希一臉鬍鬚,女友就戴帽,垂頭急急上車。記者問秦舒培是否未離婚?秦未有回應,而陳冠希即上前,用腋下想夾住記者部相機同DV機,頗為激動。記者再問陳冠希是否同秦舒培拍拖?陳即高呼:「我有好多女朋友0架喎!你去我IG睇下啦!」

之後陳冠希講咗句「唔該晒」,然後一度上番車,之後再下車,問記者:「你搵幾錢一個月呀?下?」用手機反拍記者,又趨前想吻記者相機一啖,又做V字同粗口手勢。未幾陳冠希司機同陳澤民司機也上前圖擋記者。秦舒培則一直在車內。

及後陳冠希上番七人車,準備離開。車子等到綠燈時仍遲遲不開,見到黃燈尾先至衝,然後連衝兩盞燈絕塵而去。 


文章来源




熱門文章